Lhaovo Literature Lesson One

Lhao tung'' maba shi'' ra'' Lhao nau'' bam qhid' mae''
Lhaovo laika n chye shi ai Lhaovo hpu nau ni a matu

Lhao tung''ce' mae thoe khyaug' thoe wa aqao; ngaid ra''
Lhaovo laika hta n sen nem tsaw kru gaw ning pawt re

Dao; ka''
Ga shadawn

Lhaovo         Jinghpaw                 English

Ba                   A jan                         Sun
Lo:                   wa                             go
Go;                   ga                          broken
Vo,                   wa                           pig
She'                 matsat                      eight
Lho"                shata                          moon


Exercise

Ba va''      =  chye sai
Ngaid va" =  rai sai
Lo: wa, se  =  wa sanu
Go; byaug va''  =  ga mat sai
Yab,mo,   =   yupmang
Ngho'  =  U
Myhi'' Pho''  =  Nu Wa

2017 Krismad'

Jhid' de, phug' myao'' ra'' Lhaovo myhi'' pho'' mao; nhaung: bam alhab' Ngaui Bau'' ra'' Khrismad' ayo, ngaid gashao: ein: lo,zaui'' ke' ra'' wo''. 

'' ( Ana'' ba Davi' ra'' vogaung: Bedlehem vo mae'' nung; zaung mae Lhaovo byumyu'' re khyaid' yu nae'' Asang Ye;su' Meshiya' khau: li'' va'' )''. 

Lhaovo bam qhid' mae'' ta'' ma-aung , mo matho' ngaui bau: jao; wa Ye;su' Lhao myain'' ba gyo'' ra'' ga'' ru ngaid nae'' . Mo''so wa Lhaovo byumyu'' re pe'' mung: yang; myidgye, mae li'' boe'' nhao; ru ga'' ru wa tau''da jo, gau ngaid nava''. Ai ra'' tau''da wa gatau mangaid; Mo''so yao; re Lhao myain'' khyo'' caung khin'' nhao nug yang; ngaid ra'' ga'' ru gyang'' gyang'' sho' sho' qo'' myao; ra''. Dam; dalam: wa Lhaovo yao; cao: Lhao myain'' jhau mung: xo' taui , zam'' khug na nae'' qhid' mae'' ngaid ra'' ga'' ru re: khag' maha ganae'' ein: lam'' ra''. 

Lai lo'' byaug va'' ra'' ayo, mae nyao; mo' Lhaovo jham tung'' ce' maqo'' , ju-i maba ra'' mathao su byumyu'' ra'' tung''ce' re ci yhung'' mung: na; lai lo: bam va''. Ngaid yang: re: Mo''so wa nyhao; nhae qho' re nhag' khyag' yu va'' ra''. Mho''pho'' mo'' Luka Lahung: Hhao'' Leim'' khyo'' mae'' Lhao tung''ce' re seim'' nyhang'' byid' lo va''. 

Ana'' ba nyhao; mo' Lhaovo Qidnyhab' Phung: ga'' ru phung'' lo: ru 29 zin byang'' nae'' lho'' khye' za: aca'' lo'' ra''. Lhaovo Qidnyhab' Phung: Phung'' qhid' zaui: so'' lo ra'' au: re masho; majhin , qug; qug; khai: khai: , ngug byid ngug nhe' we' ngaid mase'' ana'' ba wa Mo''so: jeju akhug mae gang'' tang: ra'' Phung: mo'' boe'' doe, lo va'' ru re qo'' khae; yu bam va''.

Lhaovo; suna qi; qhang gang'' tang: ye'' lo'' nae'' wa nao ngo Lhao nau'' yaug nge, ra'' qo yao; ngaid va''ra'' wo''. Lhao tung''ce' re ci yhung'' yang: Mo''so re caung khin'' ra'' Lhaovo mao; nhaung bam khyo'' mae'' Lhao tung''ce' maba/ maci shi'' ra'' Lhaovo jham re khyo jhui'' yu nae'' , babao'' bathaug' yu nae'' qo bo ra'' . Ai we' dakhyo: Lhao tung''ce' , myain'' thoe re maba/ maci shi'' ra'' mao; nhaung: Lhaovo bam re: zhao; yu , ci yhung'' ye'' lo'' ca'' ga'' ru re beim; galang: gyang: galang: se ein: o: lhaung: ke' ra''. 

2014 mae Malaysia Airline mae'' dao: lha dace' byaug pye' ra'' , Dam: dace' wa supe'' yang: bag phyid' khyo'' pye' ru qhug' va''. Zin yau: thao'' re za: Airasia dao: lha dace' wa mug'laba (weather) magai ru we' thaung'' qhug' mung: pang: lhai qid dae mae byid gyo'' pye' va''. Ai we' dakhyo: Isreal we' Palenstine mae wa lho'' dakhye' ko yao: gyai jho'' bag mung: byu gyai shid veko''. Syria mae yao: cao: gyai jho'' bag mung: byu khying'' myo'' sho' shid' dam mung , byu tig khyo'' qug' khai qhug' veko''. Nyhao'' taung mang: mae re: Taungzo: gye we' Lamyen gye bam nyang mavang'' gayang: mang: byu qi gyai qug' khai qhug' na bam va''. Lamyen mang: agaung: qan'' mae re: Laha jham ra'' jo,to' dau'' thug' nae'' mau'' zo'' jham re manug ra'' lamyen vo byu myhi'' pho'' jham re Lamyen volaug' gyezo: jham be, khyaid' re qhug' veko''.

Lhaovo Qid Nyhap' Phung: wa 2014 re 25 zin labyang'' ru mung: Jubili: re ngaui bau'' ngaui lho'' qo'' vao zo: va'' khyo'' ngaid ra''. Ai we' dakhyo: Lhaovo Tung''ce' we' Sam''ve, Phung: khyo'' mae'' re: Nyhao: mo' Lhaovo qi ra'' sang: jhaung Jhaung: Yham mae Lhaovo zin sag' Poe' we' daga'' Qe,do, mo'' , Khye Kham Dung: Mo'' Vao Poe qan'' re qo'' zaui: so'' va'' ga'' ru re the' gyo: , the' myao bam va'' ru ngaid. 

Malaysia joe'' na ko'' ra'' Lhaonau'' bam khyo'' mae'' re: Malay Lhaovo Zam''khug' Phaung Mo,thaui: re galho'' za qo'' phung'' qhid' ke' mung: Lalam lakhug' mau''zo'' mae thaug' qhao'' na bam veko''. 

2014 wa Nyhao:mo, Lhaovo bam qhid' mae'' gai ra'' zin ngaid ra'' ein the' myao ra''. 

2015 mae kharu'' ra'' mau'' zo'' pe'' re kharu: zaui: so'' ye'' lo'' nae'' ga'' ru re Jhid'de, phug' myao'' ra'' Lhao nau'' bam alhap nhag' qhan dang qhan taung'' ceim'' zaui so'' ye'' lo'' gelang ein qam: mho' zo'' mae'' cara'' tung'' khye' re bin pin'' ke' ru ngaid.

http://youtu.be/Urb4_wvqYaw Ana'' ba cara'' Lhaovo Jubilee nghaui'' thoe re the' myao yang: dam; to' ke' ru ngaid. Qam qu'' yu bam gelang: wo''.

Dec 29, 2014 re the' gyo'' ra'' myig-gye, lau dao: jham wa Italy we' Greece mang: gyaro: mae'' Pang:lhai mae Lha mo'' dace' myi: nga'' mung byu 500 ko qug khai qhug' na ko'' ra'' ga''. Asha' mang: mae wa Indoni''sha'' mae'' Singapu khyo dao'' lo ra'' Dao;lha dece' mug' khaung mae'' dao'' na ru mae'' mug'labajham(weather) tha'' lhag' ra'' mathao: yang: axo' ataui byid mung: khai joe'' byaug laug' maba boe'' na ko'' ra''. Qiddae mo'' mae ai ra'' dao: lha re thaug' qhao'' qho: na ko'' ra''. American mang: mae wa Interview ga'' ra'' salho daui khye' re gyai aung myaug taung'' qo'' qhu'' na ako'' ga''. Aira'' salho daui khye' wa North Korea mae'' Mang:ug re se' pye' nae'' tau thaug' qhao ra'' akhyo ngaid ga'' ru qo'' ba ra''.

Ana'' ne, ra'' sana akhyo re nyang'' myid qu'' ke' ra'' au: , nyhao: mo' Lhaovo byumyu qi wa gyai yao; masho: majhin yao; na lai lo ge-nhaung. Pe'' mung ga'' re su gaje: ra'' ba sham mae na mung: yham sang: ra'' phug'de, myen'' thoe , sam''ve, lalam lakhug re maqo'' ci yhung'' lai: lo ga'' ru re the' myao ra''. Byu damyu'' daboe: ga Mo''so phan'' to ngaid mase'' zin lam: myo; sho' mabeim: maso: mug' caid' khug mae na: lai lo bam va''. Qhid' khyo kharu: xo' mung: na ye, nae'' ga'' ru re nyang'' myid qu'' yo, joe'' va'' ra'' ein: the' myao re re tung'' xam'' ke' ra'' wo''..

Khag' Qo?

Jhid'de, ra'' Lhao nau'' bam we'' , 

Nyhao: mho' ra'' tung'' ce' we' sam''ve, lalam lakhug khyo , zaui: zo: mung ve, khyo mae thao gyo'' na: ru re tau: to' ye'' lo'' nae'' qhid' mae au: she , jhui'' zaui: so: nae'' au: she myo; myo ca'' na ra'' ga'' ru the' myao ra''. 

Lhaovo mau'' zo'' qi: qhang: lo nae'' tau jo,qo , khyi'' khao: ngo'' mae'' thaug' qhao'' na: bam ra'' nyhao: nhae qho' bam dang qhan'' ru we' byin qham taung'' qo'' zaui so'' ye'' lo'' nae'' yau: gying'' ra''. 

Vai''mo , Myidkyina , Namti'' , Lashu , Gang:mein'' , Gudkhai: , Munggu , Pang:va , Ciphaui , So'lo , Mandalay , Yangon , Taungmang: , Sae''mang: , O;mang: we' Labugmang: Malaysia , Singapore , Japan , USA , UK ga: joe'' na bam ra'' Lhaonau'' bam dang qhan'' ru we' Lhaovo mau'' zo'' mae zaui: so'' re wa Lhaovo byumyu'' ga Mo''so mang: din'' cae''lae nae'' tau we' su: byumyu'' agaung: mae bag bao qo'' boe'' doe, lo nae'' ein qo'' myid ra'' o'' .